2020-09-05

03:30:26

法庭文字直播台

#西九龍裁判法院第十八庭
#死因裁判法庭
#高偉雄死因裁判官
#研訊 [10/11]
#陳彥霖 (2004~2019, 15歲)

鑒於陪審團曾要求有更多知專設計學院(下稱HKDI)內閉路電視片段及閉路電視鏡頭分佈，以了解到9月19日彥霖放下自己物品及除鞋啲過程；警方應法庭指令向HKDI索取總時數約20小時之片段。研訊主任指出一個研訊中三次傳召同一證人並唔係正常做法，但亦唔應該由研訊主任描述證據證供，故：

重召第二十證人 警員李豪傑

警員表示因應法庭指令向HKDI再作進一步調查，睇返9樓落2樓路程及喺2樓平台彥霖放下物品嘅位置。HKDI提供最少20隻外置硬碟
嘅閉路電視片段，同埋有記錄鏡頭分佈嘅文件。警員9月1日收到法庭通知，大概昨日(9月3日)中午先收到HKDI嘅資料。

鏡頭分佈嘅文件共4頁紙，左下角有科技公司嘅logo；連同20隻硬碟都係由HKDI提供。4張紙分別係2樓、9樓、10樓、11樓嘅CCTV floor plan(閉路電視分佈平面圖)，該份文件將呈堂為C33。

警員向研訊主任確認以上資料是他本人直接同HKDI交收。

平面圖中的綠色長方形代表著CCTV鏡頭。警員表示片段主要為彥霖喺李惠利樓從9樓至2樓。睇完、一路睇(CCTV片段)嘅時候會截圖，製成23頁的截圖冊。片段全部都係新嘅CCTV片段，一見到彥霖就會截圖。

截圖冊呈堂為C34a，片段為C34。

研訊主任問有冇節錄畀法庭？警員表示下載咗經剪輯嘅片段放入USB。

從C19相簿見到彥霖於9月19月17:55喺李惠利樓9樓出現，稍後從B座2樓發現佢落樓梯。

C34a右上角寫有冧巴(編號)，係截圖相片編號。研訊主任同警員就C34a由第1張截圖逐一檢視並描述。一開始見到約17:57彥霖喺8樓落緊樓梯時手持傳單單張、頸上繫有一條黑色繩掛住一個好似牌嘅嘢，仲有拎住電話同埋著緊鞋嘅。

圖3顯示約17:58~59時彥霖行到落6M/F層。當時左手有張嘢，應該都係同一張傳單；右手有條帶，條頸好似冇再掛住。

下一張截圖時段彥霖落到6樓樓梯，然後行行下放低咗條繩，落兩級又向右擰轉頭好似係執返條繩。一路落樓下幾層至4樓都仲拎住傳單同繩。但落到2樓嘅時候雙手嘅物品已經唔見咗。

圖14/5至17大概18:34~36時彥霖開初看似仍然有著鞋，經過樓梯嘅清潔手推車時有推一推。然後行去10樓電梯大堂撳，到咗彥霖冇入到但佢旁邊一個淺色上衣嘅男仔入咗，當時畫面中彥霖已經赤腳。

稍後約18:36時赤腳嘅彥霖上到11樓梯間，想開天台門，但門係上鎖。

陪審員問最後有冇搵得返對鞋？
警員表示搵唔返。有可能因為當時開始調查時已經隔咗幾日。見到CCTV係9樓上10樓嘅時候冇咗對鞋，警方有做過sweeping(仔細地毯式搜索)但唔見。問過得知清潔工同同學提供嘅資訊都冇見過或執過鞋。

星期一將會傳召政府化驗師講述毒理報告，例如test過咩毒品毒藥。暫時未知彥霖母親當日會否作結案陳詞，預料星期五可以引導陪審團。

研訊押後至9月7日1000時西九龍法院大樓第十八庭再訊。